للأسف في حبك أنــــــا تسرعـــــت..

ظنيت ألاقـي فيـك شـيٍ فقدتـه

كنت أحسبك مجروح مثلي تولعـت

جربت فرقى شخص قلبـك وهبتـه

كنت أحسبك من مر جرحك تجرعت

حبيت فيك احساس طفـلٍ لمحتـه

لوقلت آآآه بوسط روحي توجعـت

ولو شفت دمعاتك شعوري سكبتـه

ولو تطلب اعيوني ابد ما تمنعـت

واعطيك قلبي لو بعد مـاطلبتـه

وصلت بك..... أعلى مكان وتربعت

وفي قلب غيري ياالغضي ماوصلته

واصبر على صدك واشوفك تدلعـت

واعطيك ود ومـا اظنـك حسبتـه

اذهلتني بطباعك اللـي ...تطبعـت

حتى قصيدي فيك ابد مـا فهمتـه

لو كان غاياتك حروفي فأنا بعـت

وافرح بجرح الشاعر اللي جرحتـه

وأرجوك من صدك تراني تشبعـت

خلك مع اللي عاجبـك أو عجبتـه

يكفي قهر في جيتي لك تواضعـت

تركت غيرك لجـل عينـك وبعتـه

ياليتني عـن حـب مثلك..ترفعـت

ياليت قلبي قبـل اعرفـك دفنتـه

لكن أببعد دامني بـك توهقـت

الله يرحـم حبنـا اللـي ذبحـتـه

انا شريت الود والحين انـا بعـت

وانا عطيتك قلبـي اللـي قهرتـه

في يوم جيتك اطلبـك ود واقنعـت

نفسي بأنك شخص عادي عرفته

كمل حياتك مثل مـا أنـا توقعـت

تبقى أسير الماضي اللـي فرضتـه

ولا يحزنك اني غلطان وتراجعـت

حولك بدالي ألف شخـصٍ عجبتـه

أما أنا لا يمكن أخضـع ولا طعـت

يحرم علي أعطيـك قلـبٍ خذلتـه

باريّحك من شوفتي يـوم قاطعـت

أسلوبك اللي بـه تجامـل كرهتـه

غلطان يا المقفي أنا مـا تتبعـت

غيري يتابع خطوتـي مـاتبعتـه

ما ينحني راسي لو انـي تقطعـت

وما هو انا من لا رميتـه لقطتـه

وان كان غرك حكي عذالي وطعـت

الله يعلـم كيـف قلبـي سكنـتـه

اللي ملا قلبـك علـي وتسمعـت

خله يعوض شخص مثلي خسرتـه

انـا بمـا فيـه الكفايـه تولعـت

واللي بقى من قلب فينـي حرقتـه

باول لقا سلمته احساسي وضعـت

غلطت حياتي يـوم قلبـي سلبتـه

واستسمحك فالبعد كاني تراجعت

ما عاد ابلقـى فيـك شـي فقدتـه

طبعك مثل غيرك وطبعي كما كنـت

احب شخـص ولاتركته...تركتـه!

وان شفتني صدفة بعينك تطلعـت

ذكرتني با نسـان غالـي فقدتـه